चीनसँग व्यापार सम्झौता सम्भव रहेकाे ट्रम्पकाे भनाइ

लामो समयदेखि चीन र अमेरिकाबीच अघोषित रुपले ‘ट्रेड वार’ चलिरहेका बेला नवनिर्वाचित अमेरिकी राष्ट्रपति डोनाल्ड ट्रम्पले यस सम्बन्धमा के–कस्तो नीति लिने हुन् भन्ने सर्वत्र जिज्ञासा र चासो छ । यही सन्दर्भमा अमेरिकी राष्ट्रपति ट्रम्पले बुधबार चीनसँग व्यापार सम्झौता ‘सम्भव’ रहेको बताएका छन् ।

सन् २०२० मा अमेरिकाले चीनसँग ठूलो व्यापार सम्झौता गर्न सहमति जनाइसकेको र नयाँ सम्झौता सम्भव भएको ट्रम्पले बताए । आफ्नो दोस्रो कार्यकाल सुरु भएको एक महिनापछि ट्रम्पले चीन, छिमेकी क्यानडा, मेक्सिको र युरोपेली सङ्घलाई लक्षित गर्दै सहयोगी र प्रतिद्वन्द्वीमाथि व्यापक कर लगाउने चेतावनी दिए ।

चीनबाट आयात हुने सबै उत्पादनमा फेब्रुअरीको सुरुमै उनले १० प्रतिशत थप भन्सार शुल्क लगाइसकेका छन् । सबै आयातीत कारहरूमा २५ प्रतिशत कर लगाउने र औषधी तथा ‘सेमीकन्डक्टर’ मा समान वा उच्च शुल्क लगाउने चेतावनी पनि उनले दिइरहेका छन् ।

ट्रम्पले सुरुमा सबै क्यानेडियाली र मेक्सिकोली आयातमा २५ प्रतिशत कर लगाउने घोषणा गरेका थिए । तर, निर्णय लागू हुनुभन्दा केही घन्टा अघि उक्त निर्णय थाती राख्दै मार्च १ सम्म त्यो निर्णय कार्यान्वयनमा नलाने बताएका थिए । विदेशबाट आयात हुने स्टील र आल्मुनियममा २५ प्रतिशत थप कर लगाउने कार्यकारी आदेशमा गत साता उनले हस्ताक्षर गरेका छन् ।

भ्रष्टाचारविरुद्ध साथ दिन आग्रह

असार ३१ गते प्रधानमन्त्रीबाट हटेर केही दिन आराम गरेपछि देश दौडाहामा निस्केका नेपाल कम्युनिस्ट पार्टी (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले बिहीबार सुर्खेत विमानस्थलमा सञ्चारकर्मीहरूसँग कुराकानी गर्दै ‘अप्राकृतिक रूपमा जन्मिएकाले यो सरकार धेरै लामो समय नजाने’ धारणा व्यक्त गरेका छन् ।
साउनयता पार्टीका आन्तरिक बैठक, छलफल र कार्यक्रमहरू तथा विपक्षी दलहरू र समाजवादी मोर्चाको बैठकमा सक्रिय बनेका पूर्वप्रधानमन्त्री प्रचण्डले आफू नेतृत्वको सरकारले अगाडि सारेको सुशासन, सामाजिक न्याय र समृद्धिको नारालाई अभियानकै रूपमा लिएर सुदूरपश्चिमको कञ्चनपुरदेखि पूर्वको झापासम्म पुगेर नेता–कार्यकर्ता एवं जनतासँग भेटघाट गरेका छन् ।

पछिल्लो समय आफूहरू प्रतिपक्षी भएर जनतामाझ गएकाले ‘सरकार ढाल्न सक्रिय भएर नलागेको’ उनको भनाइ छ । सत्तामा सहभागी दलहरू नै यो सरकारका कामप्रति असन्तुष्ट रहेको चर्चा गर्दै प्रचण्डले भने– ‘सरकार विरुद्ध प्रतिपक्षी दलहरू मात्रै लागेका छैनौं, सत्तामै रहेका दलहरू नै विरोधमा उत्रिएका छन्, हामी अहिले प्रतिपक्षी भएर जनताको माझ गएका छौैं, तत्काल हामी यही भूमिकामा छौं ।’ सरकारले संसदको आह्वान गर्नुको सट्टा विभिन्न अध्यादेश ल्याएर अध्यादेशमार्फत शासन गर्न खोज्नु गलत भएको उनले बताए ।

प्रधानमन्त्री ओलीले अध्यादेशमार्फत देश चलाउन खोजेको जिकिर गर्दै सरकारले नियमित सदन नबोलाएपछि प्रतिपक्षी दलका तर्फबाट माओवादीले विशेष अधिवेशन आह्वानको प्रयास गरेको प्रचण्डले उल्लेख गरे । ओली नेतृत्वको वर्तमान सरकार भ्रष्ट कर्मचारीलाई बचाउन र राम्रो काम गर्ने कर्मचारीलाई आक्रमण गर्न उद्दत रहेको आरोप समेत प्रचण्डले लगाए । बिहीबार बाँकेस्थित खजुरा गाउँपालिकामा आयोजित खबरदारी सभामा सहभागी हुन पुगेका प्रचण्डले २०६४ को निर्वाचनमा जस्तै माओवादीलाई बहुमत दिएमा देशबाट भ्रष्टाचार निर्मुल पार्ने बताए ।

अहिले आफूहरूसँग ३२ सिट मात्रै हुँदा समेत भ्रष्टाचारविरुद्ध सशक्त लडेको उल्लेख गर्दै ०६४ को निर्वाचनमा जस्तै २०८४ मा पनि बहुमत पाए नेपालबाट भ्रष्टाचारको जरोकिलो उखेलिने विश्वास उनले दिलाए । फेरि एक पटक नयाँ लडाइँका लागि जनताको साथ चाहिएको उनले बताए । माओवादी आफ्नो खुट्टा र आफ्नै एजेन्डामा उभिने दावी गर्दै अब भ्रष्टाचारीहरूसँग समीकरण नगरिने उनले बताए । भ्रष्टाचारविरुद्ध अभियान नै बनाएर आफू देश दौडाहामा निस्किएको स्पष्ट पार्दै प्रचण्डले भने– ‘सुशासन, सामाजिक न्याय र समृद्धिको पक्षमा म देशभर अभियानमा छु । मेरो नेतृत्वमा बनेको सरकारले आफ्नो वा अर्को नभनी भ्रष्टाचारविरुद्ध अभियान थाल्यो । तर, भ्रष्टाचारीहरूले षड्यन्त्रपूर्वक मलाई सरकारबाट हटाए ।’ आफूहरू जनतामा फर्किएको दोहोर्याउँदै उनले भने– ‘हाम्रा पनि केही कमी–कमजोरी भएका छन् । त्यसमा हामीले गम्भीर समीक्षा गरेका छौं । अब त्यस्ता गल्ती दोहोर्याइँदैन ।’

भ्रष्टाचार विरोधी अभियान लिएर आफू कञ्चनपुर, झापा, हिमाल एवं मधेस जहाँ पुगे पनि त्यहाँका हजारौं कार्यकर्ता माओवादीमा समाहित भएको प्रचण्डले बताए । जनयुद्ध दिवसको अवसर पारेर पूर्व–पश्चिम मध्यपहाडी राजमार्ग केन्द्रित अभियान सञ्चालन गर्ने निर्णय केन्द्रीय समतिको बैठकमार्फत गरेको उल्लेख गर्दै समाजवादको आधार तयार पार्नका लागि नेतृत्व गरेको माओवादीले १२३ पालिकालाई नमूना बनाउने, पार्टी रूपान्तरण र जनपरिचालन अभियानकै उचाईमा प्रचण्डको भ्रमण र कार्यक्रमहरूलाई लिनुपर्ने उपमहासचिव गिरिराजमणि पोखरेलले बताए ।

भर्खर सम्पन्न भएको केन्द्रीय समितिको बैठकले संविधानमा व्यवस्था भएको समाजवादउन्मुख समाजवादी आन्दोलनको आधार तयार पार्न नयाँ पार्टी निर्माणका साथसाथै विचारको संश्लेषण गर्ने निर्णय गरेको उपमहासचिव पोखरेलले बताए । ‘माओवादीले नेतृत्व गरेका १२३ पालिकालाई नमूना बनाउने, अभियान चलाउने र जनपरिचालन गर्ने भनिएको छ,’ उनले भने– ‘अध्यक्ष प्रचण्डको भ्रमणलाई त्यही ढंगले बुझ्नुपर्छ ।’

साउन २६ देखि ३१ सम्म माओवादी स्थायी समितिको बैठक बसेको थियो । स्थायी समिति बैठकले एक महिनासम्म सबै प्रदेशमा परामर्श बैठक राखेर स्थानीय नेताहरूका विचार र भावना बुझ्ने निर्णय गरेको थियो । त्यसबाट आएका सुझाव र सल्लाहका आधारमा अध्यक्ष प्रचण्डले प्रस्तुत गरेको राजनीतिक दस्तावेज केन्द्रीय समितिको बैठकबाट पारित भएको थियो । अब २०८४ सम्म सत्तामा नफर्कने बताएका प्रचण्डले सुशासन, सामाजिक न्याय र समृद्धिका लागि ओली सरकारको बहिर्गमनलाई भने अनिवार्य शर्तका रूपमा लिएका छन् ।

एसका नेताहरूको नयाँ कार्यविभाजन

नेपाल कम्युनिस्ट पार्टी (एकीकृत समाजवादी) ले राष्ट्रिय महाधिवेशन सम्पन्न भएको छ महिनापछि नेताहरूको जिम्मेवारी हेरफेर एवं कार्यविभाजन गरेको छ । सो पार्टीले तत्काल अन्य कुनै पनि पार्टीसँग एकता नगर्ने समेत निर्णय लिएको छ ।

उक्त पार्टीका केन्द्रीय सचिव सोमप्रसाद पाण्डेयले जनाएअनुसार अध्यक्ष माधवकुमार नेपालको अध्यक्षतामा सम्पन्न स्थायी कमिटीको बैठकले गरेको कार्यविभाजन अनुरूप २४ सदस्यीय केन्द्रीय सचिवालय गठन भएको छ । नयाँ कार्यविभाजनअनुरूप सम्मानित नेता झलनाथ खनाललाई स्कुल विभाग प्रमुख, बेदुराम भुसाललाई सङ्गठन विभाग प्रमुख, प्रमेश हमालालाई विदेश विभाग प्रमुख, घनेन्द्र बस्नेतलाई राजकीय मामिला विभाग प्रमुख र राजेन्द्र पाण्डेलाई मोर्चा फाँट प्रमुखमा जिम्मेवारी तोकिएको छ ।

यसैगरी, उपाध्यक्ष जगन्नाथ खतिवडालाई संघीय तथा प्रादेशिक मामिला प्रमुख, उपाध्यक्ष प्रकाश ज्वालालाई प्रचार विभाग प्रमुख, उपाध्यक्ष जयन्ती राईलाई अखिल नेपाल महिला संघ समाजवादीको इन्चार्ज, उपाध्यक्ष भानुभक्त जोशीलाई सुदूरपश्चिम प्रदेश इन्चार्ज, उपाध्यक्ष धर्मनाथप्रसाद साहलाई मधेस प्रदेश इन्चार्ज र उपाध्यक्ष गङ्गालाल तुलाधरलाई बागमती प्रदेश इन्चार्जको जिम्मेवारी तोकिएको छ । त्यस्तै, महासचिव घनश्याम भुसाललाई अनुगमन, उपमहासचिव राजेन्द्र राईलाई कोशी प्रदेश इन्चार्ज, उपमहासचिव रामकुमार भट्टराईलाई कार्यालय सचिव, उपमहासचिव गरिमा शाहलाई संसदीय इन्चार्ज र उपाध्यक्ष मेटमणि चौधरीलाई लुम्बिनी इन्चार्जको जिम्मेवारी दिएको छ । सचिव श्रीनाथ बराललाई गण्डकी इन्चार्ज, अर्का सचिव चन्द्रबहादुर शाहीलाई कर्णाली इन्चार्ज तथा लक्ष्मण केसीलाई युवा विभागको इन्चार्ज र रामकुमारी झाँक्रीलाई विद्यार्थी विभागको इन्चार्जका रूपमा जिम्मेवारी दिइएको छ ।

एकीकृत समाजवादीको स्थायी कमिटीको बैठकले यसअघि पारित आगामी कार्ययोजनाअन्तर्गत कार्यदिशा र सिद्धान्तमा एकरूपता नभएसम्म अन्य पार्टीसँग एकताको सम्भावना नरहेको निष्कर्ष निकालेको थियो । सो कार्ययोजना महासचिव घनश्याम भुसालद्वारा स्थायी कमिटीमा प्रस्तुत भई पारित भएको थियो । महासचिव भुसालले आगामी कार्यक्रम तथा नीतिलगायत विषयमा प्रतिवेदन प्रस्तुत गरेका थिए ।

एसको यसै बैठकले आगामी निर्वाचनमा देशैभरि पार्टीका उम्मेदवार खडा गर्ने निष्कर्ष निकाल्दै सोहीबमोजिम पार्टीको सांगठनिक सुदृढीकरण गर्ने समेत निर्णय गरेको छ । केन्द्रीय कार्यालय आलोकनगरमा मंसिर २६ देखि जारी बैठकमा पार्टीको आगामी कार्ययोजना निर्माण गर्ने विषयमा नेताहरूले धारणा राख्ने क्रम सकिएपछि संगठन सुदृढीकरण गरी ‘पार्टी गाउँका जनतासँग’ कार्यक्रम सञ्चालन गर्ने निर्णय भएको उपाध्यक्ष जगन्नाथ खतिवडाले जानकारी दिएका छन् ।

हाई भ्यु माविको अभिभावक दिवस भव्यतापूर्वक सम्पन्न

महालक्ष्मी नगरपालिका वडा ५ अन्तर्गत रहेको हाइ भ्यु मा वि स्कुलले सभ्य र भव्य तरिकाले अभिभावक दिवस मनाएको छ । शनिबार आफ्नै विद्यालय प्राङ्गणमा स्कुलले सभ्य र भव्य तरिकाले अभिभावक दिवस मनाएको हो ।

तत्कालीन स्वास्थ्यमन्त्री तथा महालक्ष्मी नगरपालिकाका प्रमुख रामेश्वर श्रेष्ठको प्रमुख आतिथ्यतामा स्कुलले दिनभर अभिभावक दिवस कार्यक्रम मनाएको थियो । कार्यक्रममा विशेष अतिथि,अतिथि,सयौँको संख्यामा अभिभावक,कलाकार पत्रकार, खेलकर्मी, शिक्षक शिक्षिका, कर्मचारी र विद्यार्थीहरुको उपस्थिति रहेको थियो ।

रोलक्रम अनुसार प्याब्सनका वरिष्ट उपाध्यक्ष तारा खनाल, वडाध्यक्ष कपिल केसी, विभिन्न विद्यालयका प्रधानाध्यापक उपस्थित उक्त कार्यक्रममा मन्तव्य, गीत, नाचलगायतका प्रस्तुति चलेको प्रधानाध्यापक सुन्दर श्रेष्ठले बताए । कार्यक्रममा विद्यालयको तर्फबाट अतिथिहरुलाई टोकन अफ लव प्रदान गरिएको थियो ।

संगीतकर्मी, शिक्षक शिक्षिकालगायत सम्पूर्णलाई मायाको चिनो प्रदान गरिएको थियाे । कलाकारहरु सलिना मोक्तान, रोजन तामाङ र आर्टी साइकोले आआफ्नो गीत प्रस्तुत गरे भने वडाध्यक्ष कपिल केसीले विद्यालयलाई ‌बधाई दिएका थिए । अनौपचारिक रुपमा करिब १० बजे साइन्स एक्जीविसन सहित सुरु भएको उक्त कार्यक्रममा प्रमुख अतिथिको आगमन अलि ढिला हुने भएपछि पौने १२ मा राष्ट्रियगान गाएर औपचारिक कार्यक्रम सुरु गरिएको थियो । विद्यालयका प्रधानाध्यापक सुन्दर श्रेष्ठको अध्यक्षतामा सुरु भएको उक्त कार्यक्रमलाई विद्यालयका विद्यार्थीद्वारा सञ्चालन गरिएको र धन्यवाद महेश सरले दिएको होस्ट इन्चार्ज सन्जय केसीले बताए ।

गम्भीर समुन्द्र सेतुको ७१औँ वार्षिकाेत्सव सम्पन्न

महालक्ष्मी नगरपालिका- २ मा रहेको गम्भीर समुन्द्र सेतु माध्यमिक विद्यालयको ७१औँ वार्षिकाेत्सव कार्यक्रम भव्य र सभ्य रुपमा सम्पन्न भएको छ । महालक्ष्मी नगरपालिकाका मेयर हरिगोविन्द श्रेष्ठको प्रमुख आतिथ्यतामा गत शुक्रबार विद्यालय प्राङ्गणमा विद्यालयको वाषिर्कोत्सव कार्यक्रम भव्य र सभ्य रुपमा सम्पन्न भएको हो ।

नगरपालिकाका उपमेयर लक्ष्मी महर्जन र नगरपालिकाका प्रमुख शिक्षा अधिकृत चीरञ्जीवी पौडेलको समेत कार्यक्रममा विशेष आतिथ्यता रहेको विद्यालय व्यवस्थापन समितिका अध्यक्ष तथा कार्यक्रमका सभापति केदार कुमार केसीले जानकारी दिए । नगरपालिकाका १० वटै वडाध्यक्षलाई पनि कार्यक्रममा निम्तो गरिएको उनले बताए । राष्ट्रियगान बजाएर कार्यक्रमको प्रारम्भ भएकाे त्यसपछि महालक्ष्मीगान पनि गाइएको उनले बताए । कक्षा ११ र १२ सम्म पढाइ हुने सो माध्यमिक विद्यालयको भौतिक पूर्वाधार महालक्ष्मी नगरकै उत्कृष्टतामा रहेको केही अतिथि वक्ताहरुको भनाइ थियो।शिक्षक अभिभावक संघका अध्यक्ष हरिहर बहादुर अधिकारीले ०७९/०८० को सामाजिक प्रतिवेदन सहित आफ्नो मन्तव्य राखेका थिए ।

विद्यालयका प्रधानाध्यापक देवेन्द्र महर्जनले विद्यालयको ५ करोड रासीको वार्षिक प्रतिवेदन प्रस्तुत गर्नुभएको थियो । साथै, विद्यालयको स्मारिका अंक समेत विमोचन भएको सो कार्यक्रममा विद्यालयको विकासमा सहयोग पुर्याउने आनन्द अधिकारी र बसन्त सुबेदीलाई सम्मान गरिएको थियो । वर्षभरिमा विद्यालय क्यालेन्डर अनुसार गरिएका अतिरिक्त क्रियाकलाप अन्तर्गतका खेलहरुमा बिजेता उपबिजेतालाई नगरपालिकाका मेयर हरिगोविन्द श्रेष्ठको हातबाट पुरस्कार वितरण गरिएको प्रधानाध्यापक देवेन्द्र महर्जनले बताए ।

अतिरिक्त क्रियाकलाप अन्तर्गतका खेलहरुमा राष्ट्रपति रनिङ शिल्ड,हाइजम्प,लङजम्प, १ सय देखि ३ हजार मिटर दौड लगायत रहेको महर्जनले बताउनुभयो । कार्यक्रममा अतिथिको रुपमा अक्षयकोषका संस्थापकहरु अर्जुन सुवेदी, गीता गौतम, सुशील गौतम, सुन्दर वाइ केसी र राइट टु स्टडी नेपालका अध्यक्ष पूर्ण डंगोल रहेका थिए ।

नीतिगत भ्रष्टाचारमा मन्त्री–सचिवबीच यसरी हुन्छ मिलिमतो

नेपालमा लामो समयदेखि प्रधानमन्त्री, मन्त्री तथा सचिवहरुकै मिलिमतोमा खतरनाक खालका नीतिगत भ्रष्टचार हुँदै आए पनि त्यस्ता खालका भ्रष्टचार रोकिन सकेका छैनन् । नीतिगत भ्रष्टाचारमा राजनीतिक नेतृत्व र प्रशासनिक नेतृत्वकै बढी मिलिमतो हुने गरेको तथ्य विभिन्न अध्ययनले देखाएको छ ।

अख्तियार दुरुपयोग अनुसन्धान आयोगले आफ्ना वार्षिक प्रतिवेदनहरुमा समेत नेपालमा नीतिगत भ्रष्टाचार हुने क्रम उच्च रहेको र त्यसमा राजनीतिक नेतृत्व नै मुख्य रुपमा दोषी हुने उल्लेख गर्दै आएको छ । पछिल्ला समयमा सार्वजनिक भएका ललितानिवास जग्गा प्रकरण, नक्कली भूटानी शरणार्थी प्रकरणलगायतमा समेत राजनीतिक नेतृत्व र प्रशासनिक नेतृत्वकै मिलिमतोमा अनियमितता र भ्रष्टाचार भएको पुष्टि हुँदै आएको छ ।

सो प्रकरणमा दोषी देखिएका पूर्वगृहमन्त्री बालकृष्ण खाँण, पूर्वउपप्रधानमन्त्री टोपबहादुर रायमाझी तथा पूर्वगृहसचिव टेकनारायण पाण्डेलगायत अहिले पुर्पक्षका लागि जेलमा छन् । अन्य कैयौ पूर्वमन्त्री र सचिवहरुमाथि समेत विभिन्न आरोप लाग्दै आइरहेको छ । ललितानिवास प्रकरणमा भएको अनियमिततामा पूर्वप्रधानमन्त्रीहरु माधवकुमार नेपाल र बाबुराम भट्टराई समेत मुछिँदै आएका छन् ।

विज्ञहरुका अनुसार नीतिगत भ्रष्टचारले राजनीतिक र प्रशासनिक क्षेत्र नराम्ररी कुँजिएको र बद्नाम हुँदै आइरहेको छ । प्रधानमन्त्री, मन्त्री र सचिवको मिलिमतोमा नीतिगत भ्रष्टचार हुने गरेको प्रशासनविद् शारदाप्रसाद त्रितालले दाबी गरे। ‘अहिले पनि त्यस प्रकारका ठूलठूला नीतिगत भ्रष्टाचार भइरहेका हुन सक्छन्, त्यसलाई बाहिर ल्याउन खोज पत्रकारिता आवश्यक पर्छ’– प्रशासनविद् त्रितालले भने । राजनीतिक नेतृत्व र प्रशासनिक नेतृत्वबाट लामो समयदेखि नीतिगत भ्रष्टाचार हुँदै आइरहेको र त्यसले मुलुकको विकास र समृद्धिमा गम्भीर धक्का पुर्‍याएको उनले दाबी गरेको खबर मंगलबारको नेपाल समाचारपत्र दैनिकमा प्रकाशित छ ।

प्रधानमन्त्री प्रचण्डपत्नी सीता दाहालको निधन

प्रधानमन्त्री पुष्पकमल दाहाल ‘प्रचण्ड’ की पत्नी सीता दाहालको निधन भएको छ । राजधानीस्थित नर्भिक अस्पतालमा उपचारकै क्रममा बुधबार बिहान ८ः३३ बजे उनको निधन भएको हो ।

‘कार्डियक अरेस्ट’ का कारण सीताको निधन भएको अस्पतालले जनाएको छ । दुर्लभ रोग मानिने पीएसपीबाट लामो समयदेखि उनी पीडित रहँदै आएकी थिइन् । स्नायु प्रणालीमा असर गर्ने यस रोगका कारण सीता हिँडडुल गर्न समेत असमर्थ हुँदै आएकी थिइन् ।

नेकपा (माओवादी केन्द्र) की केन्द्रीय सल्लाहकार समेत रहेकी दाहालको पार्थिव शरीर श्रद्धाञ्जलीका लागि ११ देखि १ बजेसम्म कोटेश्वरको पेरिसडाँडास्थित पार्टीको केन्द्रीय कार्यालयमा राखिने र २ बजे पशुपति आर्याघाटमा अन्तिम संस्कार गरिने जानकारी प्रधानमन्त्रीको सचिवालयले दिएको छ ।

गठबन्धनका आठै दलद्वारा उपप्रधानमन्त्री दावी

प्रधानमन्त्री पुष्पकमल दाहाल ‘प्रचण्ड’ का काँधमा यतिखेर १६ वटा मन्त्रालयको भारी छ । तर, उनी राष्ट्रपतिको निर्वाचनपछि मात्रै सरकार पुनर्गठनको तयारीमा छन् । बिहीबार काठमाडौंको तीनकुनेमा आयोजित आठदलीय गठबन्धनका सांसदको अभिमुखीकरण कार्यक्रमपछि प्रधानमन्त्री प्रचण्डले मन्त्रिपरिषद् विस्तार तुरुन्तै हुने बताएका थिए ।

त्यस दिन जे भने पनि उनी राष्ट्रपतिको निर्वाचन कुरिरहेका छन् । राष्ट्रपति निर्वाचन फागुन २५ मा हुँदैछ । राष्ट्रपति निर्वाचनअघि नै सरकार विस्तारका लागि निर्वाचन आयोगले स्वीकृति दिने तयारी गरे पनि प्रधानमन्त्री प्रचण्डले भने त्यसअगाडि सरकार पुनर्गठन नहुने संकेत गरेका छन् । उनले विश्वासको मत पनि राष्ट्रपतिको निर्वाचनपछि नै लिन खोजेका छन् ।

जहिले मन्त्रिपरिषद पुनर्गठन गरे पनि प्रधानमन्त्रसामु दलहरूलाई कसरी समेट्ने भन्ने चुनौती खडा भएको छ । आठदलीय गठबन्धनलाई चित्त बुझाएर मन्त्रिपरिषद् विस्तार गर्नुपर्ने हुँदा उपप्रधानमन्त्रीको संख्या आठजना पुग्ने सम्भावना देखिएको छ । पुस १० मा एमालेसहित सात दल सम्मिलित समीकरणमा ४ जना उपप्रधानमन्त्री थिए ।

अहिले माओवादी केन्द्रका वरिष्ठ उपाध्यक्ष नारायणकाजी श्रेष्ठ मात्रै उपप्रधानमन्त्री छन् । उनी भौतिक पूर्वाधार तथा यातायातमन्त्री पनि हुन् । आठ दलमध्ये माओवादी केन्द्रले यसअघि नै उपप्रधानमन्त्री लिइसकेकाले बाँकी सात दलले पनि उपप्रधानमन्त्री मागिरहेका छन् ।

आठ दलमध्ये नेपाली कांग्रेस, नेकपा एकीकृत समाजवादी, जनता समाजवादी पार्टी र लोकतान्त्रिक समाजवादी पार्टीलाई उपप्रधानमन्त्री दिनुपर्ने बाध्यता छ । नागरिक उन्मुक्ति पार्टीले पनि उपप्रधानमन्त्री मागिरहेको खबर आइतबारको नागरिक दैनिकमा प्रकाशित छ ।

1 2 3 9